Origen di Karnaval

Karnaval tin su  origen for di e fiestanan pagano na Roma i Gresia. Bacchanalia i Saturnalia ta algun di nan. Riba e fiestanan aki nan tabata duna e dios di kosecha Saturno i e dios di biña Bacchus onor. Durante e fiestanan  tur lei ku ta kontrola moralidat ta wordu abolí. E ta enserá sakrifisio di hende na  diosnan falsu, sèks parotín i bebeburachi.  Djei e palabra Karnaval-Bacchanal.  Boso bida tabata domina pa inmoralidat, pashon, buracheria, bakanal, paranda i adorashon di diosnan falsu. Pero awor e paganonan ta keda mashá asombrá, ora nan mira ku boso no ta kompañá nan mas den e eksesonan ei i p’esei mes nan ta papia malu di boso! 1Pedro 4: 3

 

Kustumber di disfrasa:

Romanonan tabata konsiderá e luna di Febrüari un temporada di limpiesa i ta e luna ku nan aña nobo ta kuminsa, durante kua nan tabatin ku kore ku spiritunan malu di wenter di fríaldat i skuridat, ya asina e klima lo ta sufisiente bon pa un bon kosecha. Pa kore ku spiritunan malu nan tabata subi kaya ku maskarada bistí i disfrasá, esklavonan i shonnan ta kambia di rol ku otro i homber ta bisti na muhé. Despues ku e kustumber a drenta Inglatera e fiesta di Saturnalia a bira ‘feast of fools’ i den otro paisnan Oropeo el’a bira ‘feast of ass’. Den e fiesta nan ta hasi chèrchè di e nasementu di Kristu, hungando e komedia di pesebre den misa i na final ta grita ‘hee-haw’ na luga di ‘amen’. Den siglo 15 iglesia Katóliko a stop esaki, despues ku e komportashon di e parokianon an a sali kompletamente for di man. Otro kustumber di maskarada i disfrása, ta bini di Afrika, ritualmente enmaskara, nan ta kana den sírkulo pa kore ku spiritunan malu i pa onra defuntunan.

 

Kultura pagano den kristianismo

Te ku aña 300 tabata persiguí i kruelmente mata kristiannan den Imperio Romano. Despues Emperador Konstantino a deklará libertat na kristiannan. Pa motibu aki kristianismo a bira algu popular, hopi pagano a bira ‘kristian’ sin ku nan a tende e Evangelio of berdaderamente kombertí. Nan fiestanan pagano i kultura di Oropa bárbaro, iglesia Katóliko Romano no por a saka afó. Finalmente a akseptá nan i nan a bira parti di e aktividatnan di iglesia. Asin’aki hopi di e fiestanan a drenta kristianismo i haña otro nòmber. Manera Pasku di Desember 25 i Haloween na òktober, e fiestanan di Febrüari a bin haña e nòmber Karnaval. Temporada di karnaval ta kuminsá +/- 6 di Yanüari  i kaba e djadumingu depues di djarason di shinishi, shete siman prome ku pasku di resurekshon; ‘Easter’ kuminsá. (Easter tambe ta nòmber di un diosa pagano)

 

Orígen di e nòmber Karnaval

Karnaval ta bini di e palabra latino “Carnevale” Carnem (karni) i levare (kita) ku ta nifiká, kita karni of sin karni, un adaptashon di e nòmber original Celtiko “carrus navalis” ku ta nifika un boto ku ta trese diosnan di nort pa nan fiestanan. Karnaval ta un fiesta di delisia i di goso karnal. E ta duna okashon; krea oportunidat inmenso pa aktonan pekaminoso, bergonsoso i ofensivo den bista di Dios. Asina hopi kantika di karnaval ta di dòbel sintí ku ta enkurashá hende pa lubidá riba Dios un ratu i djòdjò bai. (ku tur su konsekuensianan) Pues kome pa loko, bebe fuma, hasi kosnan inmoral,  promé ku e 40 dianan di reflekshon yega ku yama Kuaresma ku ta nifiká arepentí. Den kuaresma ta apstené di karni (Camem Levare) i paranda pa por keda limpiá (supuestamente) di tur piká ku a hasí durante di e fiesta. Asina e kustumber a pasa di Roma pa Spaña, Portugal i Fransia.

 

Karnaval tambe:  Mardi Gras

E nòmber aki ta nifiká “Djamars Vèt” na franses, ku ta e último dia di Karnaval i e último oportunidat di gosa di kuminda i bibida promé ku e djarason di shinishi. 1699: Mardi Gras a drenta Merka na New Orleans dor di un eksploradó franses ku yama Iberville. Na New Orleans te ahinda tin un kaya prinsipal yamá na su nòmber.

Karnaval na Kòrsou

Oropeanonan ku a bin pa negoshi di sklabitut tabata selebrá Karnaval den nan klupnan. Den añanan ’60 Karnaval a subi kaya huntu ku e ritmo di tumba i Kòrsou a haña su Karnaval. Awendia nan ta bisa ku e ta nos kultura, komo sifuera e ta algu di siglonan di antepasadonan,  pero e no tabata eksistí na Kòrsou mes  promé ku esei. Den kada país Karnaval a drenta di un otro forma huntu ku Katolisismo. Esei ta pone hende kere ku e ta un fiesta Kristian, pero e no tin nada di haber ku e Rabi Hudiu ku yama Hesus di Nazarèt. Lei Hudiu di Moises ta prohibí e fiestanan aki klaramente, pesei nan no por a bini di Hesus. Kon Dios por ta di akuerdo anto? Kon por bendishoná Karnaval anto? I si e ta algu bendishoná, dikon tantu desgrasia i aktonan inmoral? Nos tin ku evaluá nos kultura i drecha loke a bai malu. Kriminalidat, bo por bisa, tambe a bira parti di nos kultura, pero nos no por broma kuné. Asina tambe, si nos ke ta un país kristian di bèrdat, nos mester sigui ku e proseso di madures kristian i laga patras loke no ta di Kristu. Hende ta kreá pa adorá i tin komunion ku Dios. Lo ta bon si nos kultura ta enserá: bai iglesia ku kanto i alegria (Salmo 100:4), lesa Beibel, hasi orashon, bisti desente, hasi deporte, yuda pober  i enfermo, i lanta nos yunan den bon kaminda. Esaki e ora ei ta trese prosperidat, satisfakshon i felisidat den nos país. Nos no tin nodi di sakrifiká nos dignidat, pa supuestamente nos haña entrada di turismo di Karnaval. I hasta si turismo trese algu di plaka, e mesun sèn ta paga e polisnan overtaim kuné (Naf.150.000 na aña 2006) i Dios sa kuantu mas ta saka pa festival di tumba (Dept. Di Kultura), Selikor, Hospital i e embarasonan pafó di matrimonio ku e konsekuensianan pa henter komunidat, etc.

 

Rei Momo (lesa: Daniel 3):

Te ainda tin adorashon di diosnan falsu. Den Ñapa Amigoe di februari 2002, tabatin un artíkulo di Rei Momo i su importansia pa hopi hende aki na Kòrsou i di kon nan ta kima e pòpchi na final di karnaval.

E persona ku ta traha e pòpchi ta splika ku Rei Momo ta un símbolo bibu ku un poder misterioso. Pues no solamente un pòpchi. E ta bisa: -ku e ta un fiesta pagano. Antes nan tabata kima un hende bibu, pa bai ku piká di tur hende. -ku Momo a pèrdè balor ultimamente. Antes ta den òptògt nan ta kargu’é i mas e hendenan alab’é mas bida e ta haña i ora di kimamentu ta tira pida di disfras den e kandela i hasi un deseo. -ku Gezaghebber òf un persona importante di e pais mester hasi dies deseo durante di e kimamentu, pa kos bai bon ku e isla. -ku no mag bira lomba pa e pòpchi, pasó e ta konsiderá esaki falta di rèspèt. ku hopi kos por pasa, dependé kon e kimamentu bai. –E pòpchi ta supose di kima kompleto den 30 min. -ku despues di kima Momo no mag di toka mas pa rèspèt na e pòpchi.

Pues hopi superstishon ku no ta kuadra ku un sivilisashon kristian. ‘Nos no mag di traha niun imagen di niun dios den niun forma, Dios ta kastigá esnan ku ta hasi e kosnan aki te den di kuater generashon.’ Eksodo 20:1-6

 

Kiko awor?

Awor nos sa kiko hende ta kere, pero kiko Dios ta pensa di tur esakinan? Ounke Karnaval (i kosnan rondó di djé) no ta e úniko tentashon ku tin, e ta un tentashon fuerte pa hopi hende. E ta un kos ku hende ta spera kasi henter aña ariba pasó sin dje nan bida ta

laf, pero nos ke atvertibo i deskurashabo di partisipá. Tin masha hopi otro kos ku bo por hasi ku ta dibertí i ala bes ta bon pa bo, i ta duna muchu mas satisfakshon. Asta si bo partisipá inosentemente, bo ta kontribuí ku un evento i filosofia ku ta hiba otro hende den pèrdishon. I bo mes tampoko lo no keda asina inosente mas. ‘No partisispa na e aktonan inutil di hendenan ku ta biba den skuridat, pero ekspone nan akto.’Efe 5:11 ‘Niun hende no por sirbi dos dios, lo e odia esun i stima e otro. Lo e pega un na su kurason i menospresiá e otro. Ta imposibel sirbi Dios i mamon.’ Mat 6:24  Hesus di: ‘Si bo stimami bo ta warda mi mandamentunan’  Huan 14:23

Ta kima e pòpchi pa e bai ku piká di tur hende. Esaki ta un imitashon satániko di e sakrifisio ku Kristu a hasi. Kristu ta e úniko ku a muri pa nos pikánan. (Huan 3:16) Tambe nan ta bisa ku hende su pikánan ta wòrdu pordoná den kuaresma (ku ta nifiká arepentí), pero Beibel ta bisa “Bai i no peka mas.” Ku otro palabra,  mester tin duele di bo pikánan ku e intenshon i deseo sinsero di no hasi meskos mas, sino e no ta arepentimento berdadero, ku konsekuensia ku no tin pordon.  Bida Kristian no ta un siklo di piká i pordon pero un kresementu di e karakter di Hesus den bo bida. Ora bo nase di nobo, Dios ta dunabu deseonan nobo i poder pa vense tur tentashon.

 

Lokual Dios a hasi:

1) Hopi biaha un kriminal no ta kompronde e gravedat di su akto te ora e tende su sentensia. Asina tambe hende ta kere ku fiernu no ta kuadra ku gravedat di nan pikánan. Nan ta bisa ku Dios ta bon, pero ta netamente pasobra e ta bon, e no por laga piká pasa por alto numa. Komo bon Hues, un Dios sumamente Santu i Rekto no por keda sin kondena tur ‘kibradó di Ley moral di Dios’ (pekador) na kandela di fiernu (Romanonan 3:10). Sabiendo ku niun hende lo no por sali liber di sentensia; den Su amor pa hende ku E’la krea den Su imágen i ku e balor ku E ta duna na alma di hende, El a buska un manera pa nan por sali liber di kastigu eterno. E no ke pa niun hende topa ku n’E komo Hues. (Echonan 17:30, 31)

 

2) ± 2000 aña pasa Dios Yu mes a bini abou, a nase komo hende manera e profetanan a pronostika. (for di e kaida di hende te na e binida di Hesus tin mas ku 300 profesia tokante Su binida i Su bida) Hesus a bai na e krus pa paga e but pa bo. El a wòrdu derá i a lanta for di morto pa E mes por ta bo abogado.  (Romanonan 10:9-19)

 

Kiko ami tin ku hasi?

 1) Humilia mi mes i atmití ku segun Dios Su standart moral mi ta un gran pekador.

2) Arepentí sinseramente di tur mi pikánan, bira lomba pa piká, invitá Hesus bin biba den mi kurason pa E bira mi Señor i Salbador. (Romanonan 10:13)

 

Kiko mi no tin ku hasi?

No konfia riba bo mes bon echonan pa salbabu den e dia di huisio. No konfia riba ritual of seremonia, ni orashon di otronan pa bo alma. No konfia riba un edukashon kristian of un deramentu kristian.

 

Kuminsá 1. hasi orashon (papia ku Dios) tur dia 2. lesa bo Beibel  3. buska un iglesia kaminda tin otro hende manera bo ku ke biba pa Dios di bèrdat, (Hebr. 10:25)  4.  konta otro di bo eksperensia i 5. Sostene e evangelio.  Hesus ku rason i derechi a bisa: “Ami ta e kaminda, bèrdat i bida; ni un hende no ta yega serka Tata, si no pa medio di Mi.”  (Huan 14:6)

Kisas e bida Kristian lo tin su difikultatnan (1Pedro1:6, 2:11, 3:14, 4:15) pasobra mundu lo no ko-opera, ni tampoko bo mes kurpa, pero Pablo na final di su bida a bisa Timoteo “Mi a lucha e bon lucha, mi a kore e kareda te na fin i mi a mantené mi fe” Bo por skucha radio Kristian (98.5 / 99.1 / 96.5MHz)  pa oumenta konosementu di Beibel.

 

 

 Copy Right, Produsi 2003, pa S.Flores,

Iglesia Hosanna, Saliña 135, POBox 4500.

www.radiosemiya.org www.hosannacuracao.org

Lesa tambe nos bruchure di Shete Fiesta di Señor,  Desviashonnan Seksual, Pasku Desempaketa, Halloween