Bo ta sufisiente bon pa drenta shelu?

Laga nos kontestá e pregunta ku un tèst kòrtiku. E por ta difísil pero purba yega te na final di e tèst i sea honesto ku bo mes. E tèst ta enserá 5 pregunta simpel ku bo por hasi bo mes.

Bo a yega di gaña? Si e kontesta ta si, kiko nos ta yama un hende ku ta gaña, i kuantu biaha bo mester gaña pa bo keda yamá un “gañadó”?

Bo a yega di hòrta algu, mata un persona, òf kometé adulterio? Promé ku bo kontestá e di dos pregunta, Hesus a bisa ku si bo odia un persona, Dios ta mira’bo komo un maton. Hesus a bisa tambe ku si bo wak un persona ku gana di drumi ku ne (fornikashon), E ta mira abo komo un adúltero den bo kurason.

Bo a yega di husa Dios su nòmber en bano (sin rèspèt, manera e palabranan aki, “OMG!” “AI DIO!” “HESU!”)? Esaki yama blasfemia, i e ta algu hopi serio den bista di Dios.

Nos a pasa den 5 di e 10 mandamentunan. Segun Dios su standart moral, bo ta un bon persona si òf nò? Pens’é bon, i sea honesto ku bo mes.

Si bo no ta un bon persona, kiko abo por hasi pa drenta shelu ora bo muri?

Beibel ta bisa ku despues di (bo) morto ta bin e huisio, kaminda Dios ta bai husga kada persona pa tur loke nan a hasi i asta loke nan a pensa. Segun e tèst, kon abo ta pará e dia ei?

Beibel ta bisa tambe ku niun hende no ta bon, ni sikiera unu.

Beibel ta bisa ku tur gañadó lo tin nan parti den kandela (fièrnu) pa semper. I tambe ku tur fornikadó, adúltero, homoseksual, lo no drenta shelu. Na e straf severo ku Dios a pone (fièrnu) pa maldat bo por mira kon malu e ta pa “simplemente” gaña. I kon serio Dios ta tuma maldat.

Si esaki ta bo situashon aktualmente, kiko bo por hasi pa drenta shelu?

Promé ku mi duna’bo e solushon, lagá mi mustra’bo e diferensia entre religion anto un kristian bèrdadero (“kristian” ta nifiká siguidó di Kristu). Tur religion (Testigu di Jehova, Mormon, Islam, èts.) ta bisa (den un forma òf otro) ku nos mester hasi algu òf “bon obra” pa nos kumpra nos salbashon serka Dios, pa nos paga bèk pa e malu ku nos a hasi kontra di Dios. Dios no ta akseptá esaki. Beibel ta bisa ku no tin nada ku abo por hasi pa salba bo mes di fièrnu.

Lagá mi ilustrá religion ku e ehèmpel aki:

Si aki na mundu bo para dilanti un wes pa ladronisia di un outo i un asesinato ku bo a kometé 20 aña pasá, e wes lo laga bo bai liber si bo bis’é ku bo a duna tur bo sèn na hende pober? Of kisas pasó bo a biba manera un hende “perfekto” pa tur e 20 añanan despues di bo krimen?

E wes lo kontestá bo ku, bo no ta pará dilanti dje pa e bon ku bo a hasi pero pa e malu ku bo a hasi 20 aña pasá. E tempu ku a pasa no ta bai yuda bo kaso, e “bon” ku b’a hasi tampoko. No tin nada otro ku a sobra, pero pa paga pa bo krimen den prizòn.

Asina tambe ta ku Dios. E ta un wes perfekto. E no por keda kumprá ku bo “bon obra” nan. E no por pèrmití maldat drenta shelu. Pero tampoko e no ke pa bo bai fièrnu pa semper. Bo pikánan a hasí bo shushi den su bista. Awor kiko ta e solushon?

Dios mes a proveé e solushon pa bo.

Kisas ta algu ku bo a tende di dje kaba, pero nunka bo no a komprondé su nifikashon eterno di bèrdat. Dios a manda su úniko yu, Hesus! El a nanse den kurpa di un hende. El a biba 33 aña sin hasi ni un kos malu i na final di su bida, el a muri kruelmente na un krus. E no a muri pa algu ku e mes a hasi. El a muri pa algu ku abo a hasi. El a tuma bo maldat riba su mes.

Hesus ta Dios i Dios su tata ta akseptá e pago di su sanger pa tur loke abo a hasi robes. Loke Hesus a hasi ta un regalo pa abo i ami por biba pa semper den shelu. Beibel ta bisa ku si bo buta bo konfiansa den Hesus (i lokual E a hasi pa bo) lo bo ta salbá. Enbes di konfia den bo mes, i den religion, buta bo konfiansa den Hesus.

Si di bèrdat bo ta stima i konfia den Hesus, lo bo obedesé su mandamentunan. Nos no ta obedesé Dios su mandamentunan pa nos bira “bon hende”. Nò! Nos ta obedesé su mandamentunan pasó nos stim’E di bèrdat. Beibel ta bisa esun ku nombra e nòmber di Hesus, mester kita for di su maldatnan.

Tur loke ku mi a skirbi ta konta pa ami tambe, mi no ta husgando bo. Beibel ta bisa ku kada persona ku no buta nan konfiansa den Hesus ta husgá kaba.

E por ta difísil pa lesa i akseptá pero sea honesto ku bo mes i pens’é bon. Ora bo muri i para dilanti Dios, lo bo ta sufisiente bon pa drenta shelu?

Hesus a bisa: Ki benefisio un hende tin, si e gana henter mundu i pèrdè su alma? Hesus ta e úniko manera pa haña salbashon, no tin ningun otro nòmber den shelu òf na tera ku un persona por keda salba di su maldat nan.

No tarda! Bo no sa si bo tin un mañan. Beibel ta bisa ku awe ta e dia pa arepentí di tur bo pikánan, p’esei buta bo konfiansa den Hesus. Dios no por gaña! E ta primintí bo ku si bo hasi esaki lo bo haña bida eterno di dj’E komo un regalo.

Si bo ke ta serio ku Dios, e kaminda no ta bai ta fásil. Dios mes lo dunabu e forsa ku bo mester pa vense tur maldat. Lesa su palabra tur dia i konfia den dj’E, pasó E ta bo guia den e bida aki.

“Hesus a kontest’é: ‘Ami ta e kaminda, bèrdat i bida; niun hende no por yega serka Tata, si no ta pa medio di Mi.”

“E kosnan aki mi a skirbi boso ku ta kere den e nòmber di e Yu di Dios, pa boso por sa ku boso tin bida etèrno.”